香港 Web 2.0 聚會
上年十月我有幸認識到幾個香港 Web 2.0的中堅分子，想唔到短短大半年間香港的 Web 2.0 發展迅速，計計埋埋已有一打, 今晚更會聚首一堂 chit chat 一番, 多得Uta發起和籌備。
雖然我自己做website 搵食，但係一直都無搞任何 Web 2.0，原因好簡單：就係做公司的projects都忙死。做一個 product 同做 project 好唔同，唔係話跟 spec 做完就得，就算係熟手技工，好快做到出來又如何，而家講全球競爭，一定要日以繼夜咁不停改進，又要兼顧marketing同support, 少D心力同財力都無可能。所以見到這呢班咁有 heart 的年青人對Web的熱誠和成績，真係打從心底裡佩服（又羨慕）！
今日下午滂沱大雨，我係中環塞緊車時，竟然聽到收音機裡講起 EditGrid, aNobii 同Recruit.net！ 我拿拿臨「豎起」耳仔聽，原來係香港電台第二台的《 e 個 世 界 》講Webby Awards。連香港的大眾傳播媒體都提，我諗真係要多謝巴士阿叔同YouTube。
好多人都睇小香港的I.T., 我同意香港未必係做科研的理想地方，但我反而睇好做 Web 這方面的發展。原因有幾個：
- 做 Web 的成本同技術門檻都不高，容易開始，正一「小本經營」
- 香港人夠快、夠靈活又心急，做 Web 都幾適合
- 而家做 Web 要「面向世界」，香港人慣晒兩文三語，搞多語言(multi-lingual)有優勢
- 經過二千年的科網泡沬，大家都踏實了許多，去蕪存菁，有利長遠的健康發展
當然，我意思唔係話搞 Web 就會賺大錢（係我就發左啦！），「睇好」意思係如果意念好又實行到的話，應該係一門做得過的生意／工作。其實個市場越成熟，就越難賺大錢 (windfall), 真係好有熱誠的人先會鍥而不捨咁一路堅持做落去，而呢股熱誠，並不是靠一個虛無漂渺的「發達可能」撐落去的，最後如果真係賺大錢，也只是美妙的by-product。